गुणवत्तापूर्ण कृषि उत्पादनांच्या निर्मितीतून स्वतःची ओळख निर्माण करा विभाग प्रमुख डॉ. सुरेश दोडके यांचे वक्तव्य
मार्केटमध्ये गुणवत्तापूर्ण उत्पादनाला नेहमीच मागणी असते. या प्रशिक्षणाच्या माध्यमातून तुम्ही मिळवलेल्या ज्ञानाचा उपयोग करून तुम्ही स्वतःचा उद्योग सुरू करा. तुमच्यामध्ये प्रखर इच्छाशक्ती आणि जोखीम पत्करण्याचे धाडस असेल तर कोणताही प्रक्रिया उद्योग तुम्ही यशस्वी करू शकता.
या प्रक्रिया उद्योगातील गुणवत्तापूर्ण कृषि उत्पादनांच्या निर्मितीतून स्वतःची ओळख निर्माण करा असे आवाहन महात्मा फुले कृषी विद्यापीठाच्या पदव्युत्तर महाविद्यालयाचे वनस्पतीशास्त्र विभाग प्रमुख डॉ. सुरेश दोडके यांनी केले. महात्मा फुले कृषि विद्यापीठाचे कुलगुरु डॉ. विलास खर्चे यांच्या मार्गदर्शनाखाली अन्नशास्त्र व तंत्रज्ञान विभागांतर्गत पाच दिवसीय आंबा फळ प्रक्रिया प्रशिक्षण कार्यक्रमाचे आयोजन करण्यात आले होते. या प्रशिक्षण कार्यक्रमाच्या समारोपप्रसंगी झालेल्या कार्यक्रमात अध्यक्षस्थानावरून डॉ. सुरेश दोडके बोलत होते. यावेळी व्यासपीठावर अन्नशास्त्र व तंत्रज्ञान विभाग प्रमुख डॉ. विक्रम कड व डॉ. गणेश शेळके उपस्थित होते. याप्रसंगी डॉ. विक्रम कड यांनी सहभागी प्रशिक्षणार्थींना प्रशिक्षणानंतरही यशस्वी उद्योजक होण्यासाठी आवश्यक तांत्रिक सल्ला व मार्गदर्शन करण्याचे आश्वासन दिले. यावेळी प्रशिक्षणार्थींना मान्यवरांच्या हस्ते प्रमाणपत्रांचे वापट करण्यात आले. याप्रसंगी प्रशिक्षणार्थींनी आपले मनोगत व्यक्त केले. या प्रशिक्षण कार्यक्रमामध्ये आंबा फळापासून सरबत, सिरफ, स्क्वॅश, गर, लोणचे, मुरंबा, जॅम, पावडर, पन्हे, आंबा पोळी इ. विविध प्रक्रियायुक्त पदार्थांची प्रात्यक्षिके करुन दाखविण्यात आली. याबरोबरच अन्न सुरक्षितता व मानके कायद्याची माहिती, प्रक्रिया उद्योगाची नोंदणी, उद्योगासाठी लागणारी मशिनरी, पदार्थाचे पॅकेजींग आणि मार्केटिंक, प्रक्रिया उद्योगासाठी शासनाच्या योजना, अनुदान या संबंधीच्या माहितीबरोबरच यशस्वी उद्योजकांचे मार्गदर्शन उपलब्ध करुन देण्यात आले. या प्रशिक्षणासाठी अहिल्यानगर, नंदुरबार, जळगाव, नाशिक, सातारा, सांगली, सोलापूर व मुंबई येथील 24 प्रशिक्षणार्थींनी सहभाग नोंदविला. कार्यक्रमाचे सूत्रसंचालन श्री. राहुल घुगे यांनी तर आभार श्री. गोरक्षनाथ चौधरी यांनी मानले. कार्यक्रमाच्या यशस्वीतेसाठी श्रीमती सविता धनवडे, श्री. पोपट खर्चे आणि श्री. सुभाष माने यांनी परिश्रम घेतले.
दिपक साळवे सह योगेश पवार न्युज फोर्टिन राहुरी
✍🏻मुख्य संपादक – संजय जाधव
✍️उप संपादक – ऋषी पोळ
✍️कार्यकारी संपादक – दिपक साळवे
✍️तालुका प्रतिनिधी – योगेश पवार
